يالله يامذري نسانيس الارياح = ياباسط سبع وسبع عدايل
ياجاليٍ ظلما العتايم بالاصباح = انا دخيلك يامنجي الدخايل
ابرج لمن صدره بما فيه نضاح = من هاجسٍ بين الضلوع النحايل
يفوح في صدري واجاريه لافاح =مابين صايل فالضماير وجايل
قرايحي هاضت لها صوت صداح = هاضت وفاضت مثل وادٍ مغايل
تسابقت الافكار تجري وتنساح =ترقص طرب كنها لعوب محايل
واخترت منها جملة ابيات املاح = تنقل من اشعور الحماسة نقايل
تنقل تراحيب كما نور مصباح = برسالةٍ طالت على كل طايل
خلتني افخر واتبجح تبجاح = وانظم من الاشعار واشفي غلايل
يامرحبا ترحيبة العز ياصاح = بالشعر والشاعر عريب السلايل
اعداد مامدت الاصابع من الراح = واعداد ماهلت مزون المخايل
نجم ابن ظافر من مروين الارماح = بني منبه يالجبال الوحايل
ياحلفنا يوم العرب كون واجراح = ياهل السيوف المرهفات الصقايل
يامكرمين الضيف ضاوي وسراح = يالطيبين الكايدين الزحايل
ونعم بربعك لاتقولون مداح = عندي على ماقول ثبت ودلايل
ومشاركة شرواك تاكيد وانجاح = مانرتضي من دون شخصك بدايل
يلبس بها الموقع وسامين ووشاح = من طيبكم ياكاسبين النفايل
اقولها وانا طبيب وجراح = شيال صعبات الحمول الثقايل
متحدث باسم القبيله وشراح = اشرح بمضمونه جميع المسايل
واختامها مني عدد نبت الابراح = صلوا على المبعوث وافي الخصايل

المصدر: مجالس البوادنه - من قسم: مجلس الشاعر عبدالرحمن بن سعد البوادنه